Guillaume de Machaut - Dame, ne regardez pas

Ecouter la version chantée Interprétation : Liber Ensemble Composition : Guillaume de Machaut - Diffusé par DEEZER -

Guillaume de Machaut - (vers 1300-1377)

Dame, ne regardez pas

Dame, ne regardez pas
A vostre valour
Ne à moy, se je sui bas,
Mais loial Amour
Resgardez, qui par douçour
M'adonne d'un amoureus dart,
Par vostre dous plaisant regart.

Dame, faite à droit compas,
Je n'aim ne aour
Fors vous car tuit mi solas,
Mi ris et me plour,
Mi bien, mi mal, mi vigour,
Tout ce me vient, se Diex me gart,
Par vostre dous plaisant regart.

Dont je sui si en vos las
Qu'adès par savour
Humblement sans estre las
Recoy ma dolour.
Las! et vos cuers n'a tenrour
De l'ardure qui le mien art
Par vostre dous plaisant regart.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Guillaume de Machaut - Riches d'amour

          Interprété par l'ensemble Capilla Flamenca: - Jan Caals: Contre-ténor

Guillaume de Machaut - (vers 1300-1377)

Riches d'amour

Riches d'amour et mendians d'amie,
Povres d'espoir et garnis de desir,
Pleins de dolour et disiteus j'aÿe,
Loing de merci, familleus de merir,
Nus de tout ce qui me puet resjoïr
Sui pour amer et de mort en paour,
Quant ma dame me het et je l'aour.

Ni n'est confors de ma grief maladie
Qui me peüst de nulle part venir,
Car une amour s'est en mon cuer nourrie
Dont je ne puis joïr ne repentir
Ne vivre lié ne morir ne garir
Ne bien avoir fors languir à dolour,
Quant ma dame ne het et je l'aour.

Mais le voloir de si douce anemie
Vueil humblement et liement souffrir,
Car grant honnour m'est par li ottroïe
Contre son gré, quant je l'aim et desir.
Et s'Amour vuet que je doie fenir
Pour li amer, ce sera mon millour,
Quant ma dame ne het et je l'aour.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Guillaume de Machaut - Phyton, le mervilleus serpent

                Interprété par l'ensemble Musica Nova

Ecouter sur DEEZER Interprétation : Early Music Consort Composition : Guillaume de Machaut

Guillaume de Machaut - (vers 1300-1377)

Phyton, le mervilleus serpent

Phyton, le mervilleus serpent
Que Phebus de sa flesche occit.
Avoit la longueur d'un erpent,
Si com Ovides le descrit.
Mais onques homs serpent ne vit
Si fel, si crueus ne fier
Com le serpent qui m'escondit,
Quant à ma dame merci quier.

Il ha sept chiés, et vraiement,
Chascuns à son tour contredit
La grace, où mon vray desir tent,
Dont mes cuers an doleur languit:
Ce sont Refus, Desdaing, Despit,
Honte, Paour, Durte, Dangier,
Qui me blessent en l'esperit,
Quant à ma dame merci quier.

Si ne puis durer longuement,
Car ma dame tres douce rit
Et prent deduit en mon tourment
Et ès meschiés, où mes cuers vit.
Ce me destruit, ce me murdrit,
Ce me fait plaindre et larmoier,
Ce me partue et desconfit,
Quant à ma dame merci quier.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Guillaume de Machaut - De Fortune me dois plaindre et louer

        Interprété par l'ensemble Musica Nova - Début du chant après 1 min. 58

Ecouter sur DEEZER Interprétation : Ensemble Musica Nova Composition : Guillaume de Machaut

Sans introduction musicale Compositeur : Guillaume de Machaut Interprète : Ensemble Musica Nova - Diffusé par YOUTUBE -

Guillaume de Machaut - (vers 1300-1377)

De Fortune me dois plaindre et louer

De Fortune me doy pleindre et loer
Ce m'est avis, plus qu'autre creature
Car quant premiers encommancay l'amer
Mon cuer, m'amour, ma pensee, ma cure
Mis si bien a mon plaisir
Qu'a souhaidier peusse je faillir
N'en ce monde ne fust mie trouvee
Dame qui fust si tres bien assenee.

Car je ne puis penser n'ymaginer
Ne dedens moy trouver c'onques Nature
De quanqu'on puet bel et bon appeller
Peust faire plus parfaite figure
De celui, ou mi desir
Sont et seront a tous jours sans partir;
Et pour ce croy qu'onques mais ne fu nee
Dame qui fust si tres bien assenee.

Lasse! or ne puis en ce point demourer
Car Fortune qui onques n'est seure
Sa roe wet encontre moy tourner
Pour mon las cuer mettre a desconfiture
Mais en foy, jusqu'au morir
Mon dous ami weil amer et chierir.
C'onques ne dut avoir fausse pensee
Dame qui fust si tres bien assenee.

-----------------------
Version moderne
-----------------------

De Fortune me dois plaindre et louer
A mon avis, plus qu’autre créature
Car quand commençait à peine à l’aimer
Mon coeur, mon amour, ma pensée, ma cure (1)
M’ont si bien mis en plaisir
Que mon souhait ne pouvait que faillir
Qu’en ce monde ne fut jamais trouvé
Dame qui serait aussi bien dotée (2)

Je ne peux penser ni imaginer
Ni croire en moi que jamais la Nature
Du plus qu’on peut bel et bien désirer
Ne put faire aussi parfaite figure
Qu’elle, ou sinon mon désir
Est et sera pour toujours sans partir ;
Aussi je crois que jamais ne fut née
Dame qui serait aussi bien dotée.

Las ! Je ne peux en ce point demeurer
Car Fortune qui jamais ne fut sure
Vient sa roue à mon encontre tourner
Et mon coeur las mettre en déconfiture.
Fidèle, jusqu’au mourir
Veux ma douce amie aimer et chérir.
Jamais n’aurait une fausse pensée
Dame qui serait aussi bien dotée.

(1) Mon souci
(2) Douée, favorisée

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Machaut - Ma fin est mon commencement

Interprété par l'ensemble New York Polyphony
Compositeur : Jackson Hill

La version originale de Machaut Interprétation : Lumina Vocal Ensemble Composition : Guillaume de Machaut - Diffusé par DEEZER -

Guillaume de Machaut - (vers 1300-1377)

Ma fin est mon commencement

Ma fin est mon commencement
Et mon commencement ma fin.
Est teneüre vraiement
Ma fin est mon commencement.

Mes tiers chans trois fois seulement
Se retrograde et einsi fin.
Ma fin est mon commencement
Et mon commencement ma fin.

Biographie de Guillaume de Machaut
Biographie de Jackson Hill

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Machaut - Plus dure qu'un dyamant

Ecouter sur DEEZER Interprète : The Unknown Lover Compositeur : Guillaume de Machaut

Guillaume de Machaut - (vers 1300-1377)

Plus dure qu'un dyamant

Plus dure qu'un dyamant
Ne que pierre d'aÿmant
Est vo durté,
Dame, qui n'avez pité
De vostre amant
Qu'ociés en desirant
Vostre amitié.

Dame, vo biauté
Qui toutes passe, à mon gré,
Et vo samblant
Simple et plein d'umilité,
De douceur fine paré,
En sousriant,
Par un acqueil attraiant,
M'ont au cuer en regardant
Si fort navré
Que ja mais joie n'avré,
Jusques à tant
Que vo grace qu'il atent
M'arez donné.
Plus dure qu'un dyamant
Ne que pierre d'aÿmant
Est vo durté,
Dame, qui n'avez pité
De vostre amant
Qu'ociés en desirant
Vostre amitié.

J'ay humblement enduré
L'amoureus mal et porté,
En attendant
Vostre bonne volenté
Que j'ay et tous cas trouvé
Dure et poingnant.
Et quant tous en vo commant
Suis, je me merveil comment
Vostre bonté
M'a se grace refusé,
Quant en plourant
Vous ay et en souspirant
Merci rouvé
Plus dure qu'un dyamant.

Helas! dame, conforté
Ne m'avez en ma grieté,
Ne tant ne quant,
Eins m'avez desconforté,
Si que tout deconfort hé.
Mais nompourquant
J'ameray d'or en avant
Plus fort qu'onques mais, et que quant
Mort en miné
M'ara vostre cruauté
Qui m'est trop grant,
Lors sera bien apparant
Ma loyauté.
Plus dure qu'un dyamant
Ne que pierre d'aÿmant
Est vo durté,
Dame, qui n'avez pité
De vostre amant
Qu'ociés en desirant
Vostre amitié.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Machaut - Rose, liz, printemps, verdure

Ecouter la version chantée Interprétation : The Folger Consort Composition : Guillaume de Machaut - Diffusé par DEEZER -

Guillaume de Machaut - (vers 1300-1377)

Rose, liz, printemps, verdure

Rose, liz, printemps, verdure,
Fleur, baume et tres douce odour,
Bele, passés en douçour,

Et tous les biens de Nature,
Avez dont je vous aour.
Rose, liz, printemps, verdure,
Fleur, baume et tres douce oudour.

Et quant toute creature
Seurmonte vostre valour,
Bien puis dire et par honnour:
Rose, liz, printemps, verdure,
Fleur, baume et tres douce oudour,
Bele, passés en douçour.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Guillaume de Machaut - Tres douce dame que j'aour

Interprété par l'ensemble Gilles Binchois
Compositeur : Guillaume de Machaut

Guillaume de Machaut - (vers 1300-1377)

Tres douce dame que j'aour

Tres douce dame que j'aour,
En vous vueil tout mon temps user,
Sans departir ne nuit ne jour,
Et vous vueil loyalment amer
Com cils qui ne saroit penser
Fors à vo dous service faire,
Tant com je vivray, sans meffaire.

Car je vous ay donné m'amour
Pour vous loyaument honnourer,
Et de cuer, de corps, de vigour
Vueil tous jours vostre honnour garder;
De servir je me vueil pener
De vrai cuer, humble et debonnaire,
Tant com je vivray, sans meffaire.

Quant je voy vostre grant douçour,
Et mon cuer vient, par desirer,
Une ardeur qui le fait en plour
Moult parfondement souspirer,
Car je ne vous ose monstrer
La doleur qu'humblement vueil traire,
Tant com je vivray, sans meffaire.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Guillaume de Machaut - J'aime mieux languir

Ecouter sur DEEZER Interprété par Liber unUsualis Compositeur : Guillaume de Machaut

Guillaume de Machaut - (vers 1300-1377)

J'am miex languir

J'am miex languir en ma dure dolour
Et puis morir, s'Amour le prent en gré,
Qu'avoir mercy, se ce n'est à l'onnour
De vous, dame, que j'aim sans fausseté;
N'oncques en moy n'ot autre volenté
Ne ja n'avra, pour peinne que j'endure,
Et me fussiés ce mille fois plus dure.

Comment que j'aie en tristece et en plour
Langui lonc temps par vostre cruauté
Et que plus loing soie de jour en jour
De la merci que j'ay tant desiré,
Mais ne lairay pour ce qu'en loyauté
Ne vous aimme seur toute creature,
Et me fussiés ce mille fois plus dure.

Pour ce vous pri, dame, qui este flour
De tous les biens et de toute biauté
Et qui avés en grace et en valour
Et en plaisant maintieng tout sormonté,
Que vous daingniés avoir de moy pité,
Que ja vers vous ne penseray laidure,
Et me fussiés ce mille fois plus dure.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour

Guillaume de Machaut - Douce Dame Jolie

Ecouter sur DEEZER Interprété par Jacques Douai Compositeur : Guillaume de Machaut

Ecouter sur DEEZER Interprété par The New World Renaissance Band Compositeur : Guillaume de Machaut

Guillaume de Machaut - (vers 1300-1377)

Douce dame jolie

Douce dame jolie,
Pour dieu ne pensés mie
Que nulle ait signorie
Seur moy fors vous seulement.

Qu'adès sans tricherie
Chierie
Vous ay et humblement
Tous les jours de ma vie
Servie
Sans villain pensement.
Helas! et je mendie
D'esperance et d'aïe;
Dont ma joie est fenie,
Se pité ne vous en prent.
Douce dame jolie.

Mais vo douce maistrie
Maistrie
Mon cuer si durement
Qu'elle le contralie
Et lie
En amour tellement
Qu'il n'a de riens envie
Fors d'estre en vo baillie;
Et se ne li ottrie
Vos cuers nul aligement.
Douce dame jolie.

Et quant ma maladie
Garie
Ne sera nullement
Sans vous, douce anemie,
Qui lie
Estes de mon tourment,
A jointes mains deprie
Vo cuer, puis qu'il m'oublie,
Que temprement m'ocie,
Car trop langui longuement.
Douce dame jolie,
Pour dieu ne pensés mie
Que nulle ait signorie
Seur moy fors vous seulement.

Biographie de Guillaume de Machaut

Du même auteur :

Dame, ne regardez pas De Fortune me dois plaindre et louer Douce dame jolie J'aime mieux languir Ma fin est mon commencement Mort suis si je ne vous vois

Phyton le Mervilleus serpent Plus dure qu'un dyamant Riches d'amour et mendians d'amie Rose, liz, printemps, verdure Tres douce dame que j'aour