Le monde est ennuyé de moy

Le monde est ennuyé de moy,
Et moy pareillement de lui;
Je ne cognois rien au jour d'ui
Dont il me chaille que bien poy.

Dont quanque devant mes yeulx voy,
Puis nommer anuy sur anuy;
Le monde est ennuyé de moy,
Et moy pareillement de lui.

Cherement se vent bonne foy,
A bon marché n'en a nulluy;
Et pour ce, si je suis celui
Qui m'en plains, j'ay raison pour quoy:
Le monde est ennuyé de moy.