| Ecouter sur DEEZER Interprétation : Ensemble polyphonique de Paris Composition : Antoine de Bertrand |
| Ecouter sur DEEZER Interprétation : Métamorphoses de Paris Composition : Antoine de Bertrand |
Pierre de Ronsard - (1524-1585)
Second livre des Amours
Las ! Pour vous trop aymer
Las! pour vous trop aymer je ne vous puis aymer,
Car il fault en aimant avoir discretion:
Helas! je ne l'ay pas: car trop d'affection
Me vient trop folement tout le cueur enflammer.
D'un feu desesperé vous faictes consommer
Mon cueur, que vous brulez sans intermission,
Et si bien la fureur nourrit ma passion
Que la raison me fault, dont je me deusse armer.
Ah! guerissez moy donc de ma fureur extreme,
Afin qu'avec raison honorer je vous puisse,
Ou pardonnez au moins mes faultes à vous mesme,
Et le peché commis en tatant vostre cuisse:
Car je n'eusse touché en lieu si deffendu,
Si pour trop vous aymer mon sens ne fust perdu.
